پاکستان کی کمزور بیٹنگ: پہلے ٹیسٹ میچ میں شکست

متحدہ عرب امارات میں ابو ظہبی کے شیخ زید کرکٹ اسٹیڈیم میں نیوزی لینڈ کی ٹیم نے پہلے ٹیسٹ میچ میں پاکستانی ٹیم کو چار رنز سے شکست دے دی۔ ایک آسان ہدف میں پاکستانی کھلاڑیوں نے غیر ذمہ دارانہ کھیل کا مظاہرہ کرتے ہوئے اپنی وکٹیں گنوائیں۔ آخری آؤٹ ہونے والے بیٹسمین اظہر علی تھے اور وہ پینسٹھ اسکور بنا سکے۔

نیوزی لینڈ کی جانب سے دوسری اننگر میں بھارتی نژاد اعجاز یونس پٹیل نے انسٹھ رنز دے کر پانچ پاکستانی کھلاڑیوں کو آؤٹ کیا۔ آخری کھلاڑی اظہر علی کو بھی انہوں نے ایل بی ڈبلیو آؤٹ کیا۔ جیتنے والی ٹیم کے کپتان کین ولیمسن نے اپنے شاندار کپتانی کا مظاہرہ کیا اور پاکستانی کھلاڑیوں کو غلطیاں کرنے پر مجبور کیا۔

پاکستان کو جیتنے کے لیے 175 رنز درکار تھے لیکن ساری ٹیم 171 پر آؤٹ ہو گئی۔ میچ کے دوران ایک ایسا وقت بھی تھا جب پاکستان کا اسکور 130 تھا اور اُس کی صرف چار کھلاڑی آؤٹ ہوئے تھے۔ بعد میں اگلی چھ وکٹیں محض اکتالیس کے عوض گر گئیں۔

نیوزی لینڈ کے بائیں ہاتھ کے تیز بالرنیل ویگنر نے بھی نپی تلی بالنگ کا مظاہرہ کیا اور دو کھلاڑیوں کو آؤٹ کیا۔ ویگنر نے مسلسل تیرہ اوورز پھینکے۔ اُن کے علاوہ سوڈھی نے بھی دو وکٹیں حاصل کی تھیں۔ بابر اعظم رن آؤٹ ہوئے۔

پاکستان کی دوسری اننگز میں تین کھلاڑی بغیر کسی اسکور کے آؤٹ ہوئے اور مجموعی طور پر پانچ بیٹسمین دوہرے اسکور بنانے میں ناکام رہے۔ پانچ وکٹیں لینے والے نیوزی لینڈ کے بالر اعجاز پٹیل اپنا پہلا ٹیسٹ میح کھیل رہے تھے۔ انہوں نے میچ جیتنے کے بعد کہا کہ پانچ وکٹیں لینے کا اُن کا پرانا خواب پورا ہو گیا ہے۔ انہیں میچ کا بہترین کھلاڑی قرار دیا گیا۔

پاکستان اور نیوزی لینڈ کے درمیان دوسرا اور آخری ٹیسٹ میچ چوبیس نومبر سے دبئی میں کھیلا جائے گا۔