کویت میں غیر ملکی کارکنوں کے خلاف کریک ڈاؤن

گزشتہ چند ماہ کے دوران خلیجی ممالک سے  سستی اجرت پر کام کرنے والے ایشیائی مزدوروں کی بڑے پیمانے پر ملک بدری سے جہاں ان ورکرز کے کئی گھرانے متاثر ہوئے ہیں وہاں ان خلیجی ممالک کی تجارت اور اقتصادیات کو بھی نقصان پہنچا ہے۔ سعودی عرب اور کویت میں حکام کا کہنا ہے کہ انہوں نے ایشیائی ممالک سے ان ملکوں میں آکر کام کرنے والے اُن مزدوروں کو ملک بدر کیا ہے جن کے پاس نہ تو صحیح ورک پرمٹ اور نہ ہی قیام کا اجازت نامہ موجود تھا۔ یا پھر ایسے مزدورں کو بھی ملک بدر کیا گیا جو ٹریفک جرائم دہراتے پکڑے گئے۔ کویتی ذرائع کے مطابق ایک حکومتی وزیر نے ملک سے غیر ملکی اضافی ورکرز کو کم کرنے کے احکامات جاری کیے ہیں۔

کویت تیل سے مالا مال خلیجی ملک ہے جو غیر ملکی ورکرز پر بہت زیادہ انحصار کرتا ہے کیونکہ بہت کم اجرت میں بہت زیادہ محنت والے کاموں کے لیے اُسے غیر ملکی افرادی قوت ہی درکار ہے۔ کویت کی 3.8 ملین کی آبادی کا 69 فیصد غیر ملکی باشندوں پر مشتمل ہے۔

اس ملک میں غیر ملکی کار کنوں کی تعداد کم کرنے کا دباؤ کچھ ایسے کویتی مقامی باشندوں کی طرف سے ڈالا جا رہا ہے، جن کا کہنا ہے کہ بہت زیادہ غیر ملکی کارکن ریاست پر بوجھ ہیں۔ ان کویتی شہریوں کا کہنا ہے کہ حکام کو چاہیے کہ غیر ملکوں سے ورکرز کی بھاری تعداد کو ملک میں لاکر ان سے کام لینے کے بجائے ملک میں پائی جانے والی بے روزگاری کم کرتے ہوئے اپنے شہریوں کو روزگار فراہم کریں۔ تجزیہ کاروں کے مطابق کویت میں بے روزگاری کی شرح 3.0 فیصد ہے۔

دوسری جانب ماہرین و مبصرین کا کہنا ہے کہ اگر کویتی باشندوں کی طرف سے حکومت پر غیر ملکی ورکرز کو نکالنے کا دباؤ مزید بڑھا تو یہ عمل ملکی معیشت پر گہرے منفی اثرات مرتب کرے گا۔ کیونکہ کویت کم لاگت کے عوض افرادی قوت تک اپنی رسائی کو محدود کر لے گا۔  دوسری طرف زر مبادلہ کی سپلائی اُن ممالکت تک رُک جائے گی جہاں کے سب سے زیادہ ورکرز کویت آتے ہیں یعنی بھارت، بنگلہ دیش، پاکستان اور فلپائن.

کویت کی خاتون وزیر برائے سماجی امور اور محنت ’تھکرا الرشیدی‘ نے روئٹرز کو ایک بیان دیتے ہوئے کہا، کویت کو ہر حال میں لیبر مارکیٹ کو ریگولیٹ کرنا ہے کیونکہ اس ملک میں آبادی کا عدم توازن پایا جاتا ہے۔ انہوں نے مزید کہا کہ ان کے ملک میں  2002ء  سے 2008 ء کے درمیان غیر ملکیوں کی تعداد میں 12.4  فیصد کا اضافہ ہوا ہے۔

’تھکرا الرشیدی نے تاہم کہا، ’ہم ہر اُس غیر ملکی کی عزت کرتے ہیں جو ہماری لیبر مارکیٹ کا حصہ بنا اورجس نے کویت کی ترقی میں حصہ لیا۔ ساتھ ہی کویتی وزیر نے یہ بھی کہا کہ اُن کے ہاں ایسے غیر ہنر مند، معمولی کار کنوں کی تعداد بہت زیادہ ہو گئی ہے جو ملکی معیشت پر مثبت طریقے سے اثر انداز نہیں ہو رہے ہیں۔

یاد رہے کہ سعودی عرب سے پچھلے چند ماہ کے دوران دو لاکھ سے زائد غیر ملکیوں کو ملک بدر کیا جا چکا ہے۔ سعودی عرب میں یہ کریک ڈاؤن روزگار کی ملکی منڈی میں اصلاحات کے اس عمل کا حصہ تھا جس کا مقصد نجی شعبے میں پہلے سے موجود یا نئی پیدا ہونے والی آسامیوں پر زیادہ سے زیادہ سعودی کارکنوں کی بھرتی کے لیے آسانیاں پیدا کرنا ہے۔

km/sks(Reuters)