Полош рејтинг за Шпанија и Италија, а во фокус е и Белгија
8 октомври 2011
Меѓународната рејтинг агенцијата Фич ја образложи својата одлука со заострената криза во еврозоната, која наталожува големи ризици за двете високозадолжени земји. Покрај тоа, прогнозите за растот на економиите на Шпанија и на Италија не се поволни, соопшти агенцијата. Кредитниот рејтинг на Италија е намален од „АА-“ на „А+“, додека оценката за Шпанија сега изнесува „АА-“ наместо досегашната „АА+“.
Недовербата расте
Фич наведува дека должничката криза во Шпанија дополнително се продлабочила и агенцијата се сомнева во способноста на Мадрид за кратко време да го намали нивото на задолженост и да го забрза економскиот раст. Агенцијата исто така укажува и на губењето на доверба во банкарскиот систем во Италија и падот на вредноста на државните обврзници, што е последица на продлабочената криза во еврозоната.
Белгија во фокусот
Италија е третата по големина економија во еврозоната , со наталожени долгови од 1900 милијарди евра. Шпанија, пак, е четврта по големина економија во заедницата држави кои ја користат заедничката европска валута. Во фокусот на меѓународните агенции за кредитен рејтинг во меѓувреме се најде и Белгија. Агенцијата Мудис соопшти дека ликвидноста на високозадолжената држава е подложена на проверка.
Автор: Симе Недевски/ЕМФ/афп/ртр
Редактор: Елизабета Милошевска Фиданоска