Beogradi pret të fitojë statusin e kandidatit për antarësim në BE

Serbia pret që ndaj Beogradit të shtohen presionet e disa shteteve për njohjen e pavarësisë së Kosovës, por ajo i ka vijat e saja kufitare, të cilat nuk do t'i kalojë, theksoi Boris Tadiq pas takimit me presidentin e Këshillit të BE, Herman van Rompuy. Përfaqësuesi i BE mbështeti dialogun Prishtinë - Beograd për zgjidhjen e çështjeve teknike me shpresën, se palët do të tregojnë vendosmëri dhe përkushtim për arritjen e zgjidhjeve. Presidenti Tadiq, shprehu gatishmërinë që të angazhohet për zgjidhjen e problemeve për qytetarët në Kosovë, por edhe një herë theksoi se Beogradi kurrë nuk do ta njohë pavarësinë e Kosovës.

Sa i përket çështjeve të tjera, bashkëbiseduesit kishin qëndrime të njëjta. Me arrestimin e Ratko Mlladiqit Serbia ka bërë një hap të madh në drejtim të Evropës, tha Herman van Rompuy, i cili premtoi mbështetjen e Serbisë në rrugën e saj drejt afrimit me BE-në. „Rruga përpara është ende e vështirë, por tani është mënjanuar një pengesë shumë e madhe. Serbisë i hapen mundësi të reja dhe do të ishte mirë që në këtë rrugë të bëjë sa më shumë përparim", theksoi Herman van Rompuy.

Ndërsa Tadiq, u shpreh se me arrestimin e Mlladiqit është mbyllur një kapitull i historisë më të re. Tani vendi është fokusuar në reforma, përfundimin e bashkëpunimit me Tribunalin e Hagës dhe përmirësimin e kushteve ekonomike në vend. „Mund të pritet që të plotësojmë kushtet dhe të bëjmë reformat, në përputhje me vlerat evropiane. Bashkëpunimi me Hagën është i rëndësishëm për shkak të përgjegjësisë sonë morale dhe sistemit juridik, por në radhë të parë për veten tonë", tha Tadiq.

Presidenti serb, pret deri në fund të vitit të plotësohen kushtet që vendi i tij të fitojë statusin e kandidatit për anëtarësim në BE, ndërsa deri në pranverën e vitit të ardhshëm të fillojnë negociatat për anëtarësim.

Herman van Rompuy, shpreson se arrestimi i Mlladiqit do të jëte një hap më afër pajtimit, stabilitetit dhe paqes së përhershme në këtë rajon. „Bashkëpunimi rajonal, pajtimi dhe përparimi në rrugën e integrimeve evropiane, shërbejnë si garanci, se e kaluara nuk do të përsëritet kurrë", theksoi Herman van Rompuy.

Ndërsa Tadiq tha, se Serbia është e interesuar që edhe vendet tjera të bëhen anëtare të BE-së, duke shtuar se ajo është e lidhur me vendet e rajonit për dekada dhe shekuj të tërë. "Objektivi ynë final është Bashkimi Evropian", theksoi presidenti serb Boris Tadiq.

Autor: Bahri Cani

Redaktoi: Aida Cama