"Dialog pa negociata" - Bisedime të reja izraelito-palestineze

Për të dielën në Ramallah është planifikuar të zhvillohen bisedime mes presidentit palestinez Mahmud Abas dhe zëvendëskryeministrit izraelit Shaul Mofaz, tha të enjten (28.06.) negociatori palestinez Sajeb Erakat. Zëdhënësi i Mofas Imri Masor konfirmoi përgatitjet e një takimi por nuk deshi të përmendë një datë të saktë. Deri tani palestinezët e kishin kushtëzuar rinisjen e bisedimeve të paqes me ndërprejen e ngritjes së ngulimeve të reja hebreje. Izraeli nga ana tjetër këmbëngul për zhvillimin e bisedimeve pa kushte.

Takimi më i lartë izraelito-palestinez prej disa muajsh

Në takimin që pritet të zhvillohet të dielën Abas do të dëgjojë "idetë" e Mofas-it, tha negociatori palestinez. Në të njëjtën kohë Shtajeh theksoi se nuk pret që qeveria aktuale izraelite "të ofrojë diçka serioze për procesin e paqes".

Gjatë një vizite të presidentit rus Vladimir Putin në Betlehem (26.06.) presidenti palestinez Mahmud Abas ka kërkuar organizimin e një konference ndërkombëtare për paqen në Lindjen e Mesme. Rruga e paqes kalon përmes negociatave me Izraelin, për këtë duhet të organizohet një konferencë në Moskë, tha Abas pas takimit të martën në Bregun Perëndimor të lumit Jordan. Putini e përshendeti "qëndrimin e përgjegjshëm" të Abasit në procesin e paqes.

Putini mbështet Abasin për lirimin e të burgosurëve

Nga Putini Abasi mori mbështetjen në përpjekjet e tij për lirimin e 123 të burgosurëve palestinezë nga burgjet izraelite, të cilët janë arrestuar para marrëveshjeve të Oslos të vitit 1993 dhe 1994. Në rast të lirimit të tyre atëherë presidenti palestinez është i gatshëm për një "dialog pa negociata" me kryeministrin Netanjahu.