Ed Miliband - kryetari i ri i laburistëve britanikë

Fitorja e ngushtë e 40 vjeçarit Ed Miliband, ish-ministrit të Energjisë ndaj të vëllait, ish-ministrit të Jashtëm britanik, David Miliband erdhi e papritur. Për një kohë të gjatë Ed Milibandi ishte konsideruar me pak shanse. Deri të premten në mbrëmje, zgjedhja e David Milibandit konsiderohej madje e sigurtë. Por Milibandi i ri përfitoi nga sistemi i komplikuar i votimeve.

"Ed Miliband mori... një numër total votash prej 50,65%. Prandaj unë e deklaroj Ed Milibandin fitues dhe lider të partisë laburiste."

I vëllai, Davidi pati kryesuar në votimet për preferencën e parë, por mori më pak vota në zgjedhjet për preferencën e dytë dhe të tretë. Në tri javët e shkuara, tri milionë anëtarë të partisë dhe të sindikatave si dhe deputetë zgjodhën me votim me postë udhëheqjen e re laburiste. Krahas dy vëllezërve Miliband, për postin e kryetarit të partisë patën kandiduar edhe ish-ministri i Arsimit, Ed Balls dhe ish-ministri i Shëndetësisë, Andy Burnham si dhe deputetja Diane Abbot. Të tre konsiderohen pjesë e krahut të majtë të partisë, ashtu si Ed Milibandi.

Ish-ministri i Energjisë e pati vënë pikërëndesën e fushatës së tij në kërkesa të liberalëve të majtë siç janë të drejtat e qytetarëve dhe lufta kundër ndryshimit të klimës. Përkundrazi, David Milibandi u përpoq që pa u fiksuar në përmbajtje konkrete të fitonte një shtresë sa më të gjerë zgjedhësish.

Brez i ri udhëheqësish

Personaliteti i kryetarit të ri të partisë do të përcaktojë në mënyrë të konsiderueshme drejtimin e partisë Laburiste vitet e ardhshme. Disa vëzhgues kërkojnë të kundërshtohet kursi i rreptë i kursimeve të qeverisë me një politikë drejtuar nga nevojat e punëtorëve. Por disa politikanë laburistë kërkojnë të mbetet e hapur dera për një koalicion të mundshëm me liberaldemokratët.

"Unë do të jem në opozitë me këtë koalicion (qeveritar) kur ata të bëjnë gjëra të gabuara, por do t'i mbështes ata, kur të bëjnë gjërat e duhura. Kjo është politikë e përgjegjshme dhe politika që duan njerëzit në këtë vend. Zgjedhjet e sotme e kthejnë faqen, sepse një brez i ri ka avancuar për t'i shërbyer partisë sonë dhe shpresoj në kohën e duhur për t'i shërbyer vendit tonë. Sot fillon puna e brezit të ri".

Kështu u shpreh Ed Miliband-i, kryetari i ri i laburistëve pas zgjedhjeve. Ai vjen në krye të partisë pas dështimit në zgjedhjet parlamentare të Gordon Browni-it, kryeministër britanik. Pas kësaj Brown-i pati dhënë dorëheqjen nga kreu i partisë.

Sfidën e parë Milibandi e nisi që të dielën (26.09.), kur laburistët nisën në Manchester një takim pesëditor për të diskutuar për rolin e partisë në peizazhin e ri partiak britanik.

Autor: Auron Dodi/phoenix/Al Jazeera/Lüning

Redaktoi: Elert Ajazaj