Ish kryeministri i Pakistanit bën thirrje për çlirimin e vendit nga diktatura

Pas rikthimit nga mërgimi ish kryeministri pakistanez Navaz Sharif ka bërë thirrje të luftohet për demokracinë. Në qytetin Lahore Sharif ka deklaruar se synon të çlirojë vendin e tij nga diktatura. Atje ai u prit të djelën me entuziazëm nga mijëra përkrahës të tij. Më parë policia pakistaneze kishte reaguar me një valë arrestimesh ndaj rikthimit të ish kryeminsitrit. Qindra kritikë të presidentit të vendit Pervez Musharraf janë arrestuar bëri të ditur partia e drejtuar nga Sharif, "Lidhja Myslimane". Partia e ish kryeministrit do të marrë pjesë në zgjedhjet parlamentare në fillim të muajit janar.