Konstituohen katër komunat në veri të Kosovës

Pas një maratone diskutimesh në veri të Kosovës, ku u përfshi edhe përfaqsuesi i BE-së në Kosovë, Samuel Zhbogar, katër komunat veriore me shumicë serbe përfunduan procesin e konstituimit. Ceremonitë e nënshkrimit të deklaratës u mbajtën pak minuta para mesnatës, duke shmangur kështu mundësinë që zgjedhejet lokale të shpalleshin të pavlefshme.

Data12 janar ishte afati i fundit i shpallur nga Ministria e Pushtetit Lokal, kur komunat veriore të Kosovës duhet të nisnin punën. Radio Televizioni i Serbisë, RTS, njofton se deputetët e kuvendeve komunale dhe kryetarët e komunave kanë nënshkruar deklaratat dhe kanë bërë betimin e tyre “në pajtim me ligjin e Kosovës për pushtetin lokal dhe marrëveshjen për normalizimin e marrëdhënieve ndërmjet Kosovës dhe Serbisë”. Deputetët shqiptarë nënshkruan deklaratën me simbole të Republikës së Kosovës, ndërsa, deputetët serbë i kanë nënshkruar deklaratat në gjuhën serbe dhe me simbole të mbuluara të Kosovës.

Njoftohet se kryetari i komunës së veriut të Mitrovicës Kërstimir Pantiq, në shenjë pakënaqësie ka bojkotuar seancën inuaguruese në veri të Mitrovicës. Kërstimir Pantiq, nuk pranon që të betohet me ligjet e Kosovës dhe kështu mbetet e paqartë sesi do të veprohet më tej.

Sipas ligjeve të Kosovës

Qeveria e Kosovës kishte qëndrim të prerë që seancat përuruese në veri të mbaheshin në pajtim me ligjet e Kosovës, ndërsa, përfaqësuesit serbë kërkonin që tërë procesi të ishte neutral ndaj statusit të Kosovës. Për këtë cështje për më shumë se një javë në Bruksel u zhvilluan bisedime ndërmjet grupeve të punës të Kosovës dhe të Serbisë. Zëvëndëskryeministrja në qeverinë e Kosovës, Edita Tahiri, e cila kryesonte bisedimet, tha se “edhe Bashkimi Evropian ishte i prerë në qëndrim që komunat veriore duhet të përurohen sipas ligjeve të Kosovës, sepse kështu edhe parasheh edhe marrëveshja e Brukselit e nënshkruar me 19 prill ndërmjet kryeministrit te Kosovës, Hashim Thaci dhe atij të Serbisë, Ivica Daciq. Sipas kësaj marrëveshje pritet të formohet edhe asociacioni i komunave me shumicë serbe.