Në Gërdec 1500 trupa ushtarake për të pastruar totalisht zonën
27 Mars 2008Prokurorët që po hetojnë tragjedinë e Gërdecit kanë qenë ditën e enjte (27.03) në kraterin që është shkaktuar nga shpërthimi vdekjeprurës në 15 mars. Ata vazhdojnë të mbledhin çdo provë dhe dëshmi për tragjedinë, si dhe për ditët e mëparshme për t'u njohur me mekanizmin e punës në fabrikën e çmontimit të predhave. Gjëja më e vlefshme që prokurorët kanë në duar është kasaforta e menaxherëve të fabrikës, e cila u gjet në rrënojat në afërsi të kraterit të shpërthimit. Çdo dokument i gjetur në këtë kasafortë po studjohet nga hetuesit për t'u vënë në shërbim të dosjes Gërdeci.
Trupat xhenjere janë duke kërkuar sërish në sipërfaqen e kraterit për të gjetur dy ish punonjëset e fabrikës, të cilat kanë mbetur viktima nga shpërthimi i datës 15 mars. Pavarësisht se familjarët e tyre janë të pakënaqur nga tempi i punës së njësive xhenjere, komandanti i operacionit „Gërdeci 2008“, gjeneral Spahiu dekalroi të enjten se është e pamundur të përdoren mjete të rënda për të lëvizur masën e madhe të rrënojave në krater. Ndaj dhe njësitë xhenjere janë duke depërtuar me kujdes duke përdorur mjete të lehta.
Të enjten ka nisur një fazë e re operacionale në Gërdec, ku rreth 1500 trupa ushtarake do të kontrollojnë në mënyrë të imët të gjithë zonën e infektuar me lëndë luftarake dhe municione të paplasura, të cilat përbëjnë rrezik për popullatën aty. Gjithashtu forcat e ushtrisë do të risistemojnë të gjitha rrugët brenda fshatit dhe ato lidhëse me fshatra të tjera.