060510 Eurokrise Währung

Kaq e lirë sa tani euro nuk ka qenë asnjëherë këtë vit. Ulrich Kater, kryeekonomist pranë bankës Deka, që bën pjesë në grupin e arkave të kursimit, gjen argumenta ngushëllues të pazakontë. Sipas tij euro ende nuk është shumë e dobët.

"Ne ende gjendemi në intervalin, ku euro mund të konsiderohet si monedhë e fortë."

Për Ulrich Kater euro vazhdon të jetë e fortë në krahasim me valutat e tjera, pasi megjithë humbjen e hidhur ndodhet mbi nivelin e paritetit të fuqisë blerëse, i cili sipas tij është 1,23 dollarë.

"Euro mund të lëvizë drejt këtij kufiri, pa qenë e nevojshme të flasim për një euro të dobët."

Dhe pritet që euro vërtet të lëvizë në këtë drejtim, pasi koniunktura në SHBA po rimëkëmbet shumë më shpejt dhe qëndrueshëm se sa në eurozonë.

"Zona e euros është disi prapa sa i takon rimëkëmbjes ekonomike. Ndoshta mund të kemi periudha qetësimi, por fillimisht ekonomia amerikane do të bëjë, që dollari të forcohet. Ka të ngjarë madje që Banka Qendrore e SHBA-së të ngrejë normat e interesit përpara Bankës Qendrore Evropiane."

Kjo gjithashtu do të çojë në forcim të mëtejshëm të dollarit amerikan dhe si rrjedhojë në dobësim të euros.

Pyetjes për shkaqet e këtij zhvillimi eksperti për financat Chris Zwermann i përgjigjet duke përmendur tregtarët e valutave, aksioneve dhe titujve të borxhit. Sipas tij ata bëjnë, që e tatëpjeta aktuale e euros të përshpejtohet edhe më shumë:

"Po shitet, ajo çka posedohet: psh aksione, lëndë të para. Kjo bën që dollari të rimëkëmbet dhe jo vetëm kundrejt euros, por në të gjithë botën. Pra kemi të bëjmë me një lëvizje mbarëbotërore, që aktualisht çon në vlerësim të dollarit dhe aktualisht edhe kundrejt euros."

Për ekspertin Chris Zwermann situatë ka edhe anë pozitive:

"Kur flitet për rreziqet nuk duhet lënë pa përmendur se një euro e dobët është një ndihmë për ekonominë evropiane. Pra gjendja nuk duhet parë vetëm negativisht."

Në këtë frymë edhe vlerësimi i ekspertes së valutave Antje Praefcke nga Commerzbank. Ajo e sheh situatën nga këndvështrimi i eksportuesve gjermanë.

"Ata përfitojnë nga kursi i ulët i euros, pasi produktet që duan të shesin jashtë vendit bëhen më të lira dhe pra mund të shesin më shumë. Por edhe ana tjetër nuk duhet lënë pas dore, pra që investimet mund të tërhiqeshin nga eurozona."

Dëmet direkte të euros së dobët ndihen tek importet. Çmimet e karburantit kohët e fundit kanë shënuar rritje të fortë. Arsyeja kryesore është shtrenjtimi i importeve të naftës së papërpunuar, të cilat historikisht faturohen në dollarë amerikanë.

Autori: Peter Kochanski/Eliana Xhani

Redaktoi: Angjelina Verbica