Samiti në Berlin: Hapa konkretë për forcimin e kontrolleve të tregjeve financiare ndërkombëtare

Vendet kryesore të BE ranë dakord të dielën (22.02) në Berlin për hapa konkretë për forcimin e kontrolleve të tregjeve financiare ndërkombëtare. Në deklaratën përfundimtare të takimit në Zyrën Kancelarore në Berlin, ata kërkuan që të mos mbetet pa rregullim e mbikqyrjeje, asnjë treg, produkt e aktor financiar.

Kancelarja gjermane Angela Merkel tha në konferencën e shtypit, në përfundim të takimit të nivelit të lartë të BE në Berlin: "Ne besojmë se kemi nevojë për parime të përbashkëta në botë, përfshirë edhe trajtimin e disbalancave të mëdha në botë. Këto parime duhet të përpunohen hap pas hapi - në Londër një hap i parë, në Itali, në takimin e G-8ës një hap i dytë - për të arritur në një kartë të tillë të ekonomizimit të vazhdueshëm me parime të përbashkëta."

Një nga pikat për të cilat u ra dakord në takim ishin edhe hapa që kundërshtojnë proteksionizmin: "Ne deklarohemi për një tregti të hapur botërore, pa proteksionizëm" , tha kancelarja Merkel.

Ajo shtoi më tej se për përballimin e krizës duhet të forcohet Fondi Monetar Ndërkombëtar. Pjesëmarrësit e takimit ranë dakord që të dyfishohen mjetet e FMN-së, në mënyrë që në rast nevoje ai t'u ndihmojë shteteve në vështirësi. Kështu do të sigurohet jo vetëm stabiliteti i bankave, por edhe i vendeve.

Të nevojshme janë edhe hapa të vendosur kundër oazeve të taksave, thuhet në dokumentin e përpunuar nga ministrat e financave. Veç kësaj propozohet të hartohen direktiva të detyrueshme për shpërblimet e menaxherëve.

Takimi i Berlinit i shërben përgatitjes për takimin e nivelit të lartë për financat, të 20 vendeve më të rëndësishme të industrializuara dhe me zhvillim të shpejtë ekonomik, që do të mbahet në 2 prill në Londër.