Shumicë e lëkundur në Këshillin Federal - Koalicioni CDU/CSU - FDP dhe dhoma e përfaqësimit të landeve

Në shikim të parë, Angela Merkel nuk do të ketë probleme në mandatin e dytë, sepse ka shumicën e duhur në Parlament dhe në Këshillin Federal. Por lideri i të majtëve, Oskar Lafontaine, thotë se ata do ta kundërshtojnë ashpër në Këshillin Federal, ku përfaqësohen 16 landet e Gjermanisë, dhe do të bllokojnë ligjet e propozuara nga qeveria. Kancelarja e di këtë problem, prandaj që tani apelon për një harmoni të plotë të partive të Unionit dhe liberalëve.

"Ne e kemi për detyrë të jemi të suksesshëm. E kemi shumicën në Bundestag dhe në Këshillin Federal, që është një parakusht i mirë për aftësi veprimi. Por kjo shumicë mund edhe të humbasë, nëse nuk i realizojmë pritjet e zgjedhësve. Në maj të vitit të ardhshëm do të kemi zgjedhje shumë të rëndësishme në landin e Renanisë Veriore dhe Vestfalisë", tha Merkel.

Ky është landi më i madh në Gjermani me gjashtë vende në Këshillin Federal, ku duhet të miratohen shumë ligje të qeverisë. Partitë e Unionit dhe liberalët do të kenë në të ardhmen 37, nga gjithsej 69 përfaqësuesit e landeve.

Por në Gjermani ka shumë shpesh zgjedhje në lande. Në qoftë se në zgjedhjet e ardhshme në maj, të majtët futen në parlamentin e Dyseldorfit dhe në Renaninë Veriore dhe Vestfali, krijojnë koalicion me socialdemorkatët, atëherë koalicioni qeveritar në Berlin do të humbiste shumicën në Këshillin Federal.

Oskar Lafontaine ka filluar që tani të ushtrojë presion ndaj socialdemokratëve: "Detyra kryesore e socialdemokracisë duhet të jetë ndalimi i rënies së gjendjes sociale. Zgjedhjet në landin e Renanisë Veriore dhe Vestfalisë, kanë një domethënie të ngjashme me ato për Bundestag-un. Në qendër të vëmendjes tani do të jetë Këshilli Federal."

Oskar Lafontaine ka organizuar në vitet 90-të, si kryetar i Partisë Socialdemokrate (SPD), bllokadën e reformës tatimore në kohën e kancelarit Helmut Kohl në Këshillin Federal. Por kësaj radhe do ta ketë më vështirë, për shkak të shumë ngjyrave që ka parlamenti.

Me reformën e fundit të sistemit federal në Gjermani është zvogluar edhe numri ligjeve që duhet të miratohen edhe nga Këshillit Federal. Megjithatë, projekti më i dashur i liberalëve, për reformën e sistemit të tatimeve, duhet të miratohet edhe në Këshillin Federal.

Autor: Bernd Grässler / Bahri Cani

Redaktoi: Eliana Xhani