Tragjedia e zjarrit në Ludvigshafen - Ministri Shojble viziton Turqinë

Për Volfgang Sheublen në qendër të vëmendjes ishte tema: tragjedia e zjarrit në Ludvigshafen, ku si pasojë gjetën vdekjen nëntë qytetarë me origjinë turke. Ministri i brendshëm, i cili u shpreh i prekur thellë nga kjo fatkeqësi theksoi, se edhe ekspertët nga Turqia mund të vijnë në Gjermani për të hetuar shkaqet. Për këtë ai siguroi kryeminstrin turk Rexhep Taip Erdogan: "Unë u thashë partnerëve të bisedimeve dhe kryeministrit Erdogan, se ne vetëkuptohet, që e përshëndesim pjesëmarrjen e ekspertëve turq në hetime. Kjo së pari, sepse ata mund të na ndihmojnë, për të zbuluar shkaqet e panjohura. Dhe së dyti, nëse ka ndonjë dyshim, ndoshta tek një pjesë e popullsisë me origjinë turke në Gjermani, kjo ndonëse është e pabazë, ne duhet t´i nënshtrohemi realitetit, e përmes ekspertëve nga Turqia mund t´i shmangim këto dyshime dhe ata mund të na ndihmojnë."

Kryeministri Erdogan, i cili për ditën e enjte (7.2.) ka planifikuar një vizitë në Gjermani, sipas të dhënave të televizionit turk do të vijë bashkë me ministrin e shtetit Mustafa Said Yaziciogli si dhe me katër ekspertë të organeve turke të rendit. Kryeministri turk ndërkaq deklaroi, se do të shkojë edhe në Ludvigshafen për t´u njohur nga afër me ngjarjen.

Zjarri i të hënës (04.02) në Ludvigshafen, ku gjetën vdekjen nëntë qytetarë me origjinë turke dhe u plagosën 60 të tjerë, ishte tema kryesore në mediet e Turqisë gjatë gjithë ditës. Vazhdimisht ka pasur edhe lidhje të drejtpërdrejta të televizioneve me Gjermaninë. Gjithashtu disa herë u shpreh dyshimi, se kemi të bëjmë me zjarrvënie apo ndonjë sulm me sfond ksenofobinë, ngjashëm si në rastin e vitit 2003 në Solingen. Asokohe prej zjarrit që iu vu një shtëpie gjetën vdekjen pesë turke.

Tragjedia e Ludvigshafenit i spostoi nga vëmendja temat e tjera të vizitës së ministrit Sheuble në Turqi. Megjithatë ai u takua me përfaqësuesit e shoqatës së sipërmarrësve turq TÜSIAD, me shefin e autoritet për besimin fetar Ali Bardakoglu, si dhe me patriarkun greko-ortodoks Bartolomeu i I-rë.