Ukrainë: Sipas sondazheve paszgjedhore Porshenko kryeson

Sipas përllogaritjeve të publikuara të dielën në mbrëmje sipërmarrësi ka fituar rreth 56 për qind të votave dhe do të jetë presidenti i ri i Ukrainës.

Ish-kryeministrja dhe liderja e opozitës Julia Timoshenko fitoi vetëm 12.9 për qind të votave. Sondazhi paszgjedhor u krye nga tri institute sondazhi të Ukrainës.

Poroshenko tha se misioni i i tij i parë si president do të jetë që t'i japë fund kaosit dhe luftimeve në Ukrainë dhe të rivendosë paqen.

Poroshenko ishte i vetmi oligark i vendit që mbështeti që në fillim hapur lëvizjen pro evropiane në Maidan dhe ishte nga donatorët e saj më të rëndësishëm. Sipas një vlerësimi të revistës amerikane "Forbes" pasuria e "baronit të çokollatave", sikurse e quajnë Poroshenkon, shkon deri në rreth 1.3 miliardë euro.

Klitçko kryetar bashkie në Kiev

Ish-boksieri profesionist ukrainas Vitali Klitçko fitoi zgjedhjet për kryetar bashkie në Kiev. Sipas rezultateve paraprake kampion i shumëfishtë botëror fitoi 57.4 për qind të votave.