گھر کے بستر پر ’ پرنسپل‘ کی گھنٹی

کہتے ہیں کہ بچے اپنے والدین سے زیادہ اسکول ٹیچر سے ڈرتے ہیں۔ ماں باپ کی بات سے انکار کرنے میں تو انہیں آسانی ہوتی ہے لیکن اگر ٹیچر انہیں کوئی کام کہے تو اس کے سامنے اِدھر اُدھر گردن گھماتے ہوئے ’نہیں‘ کہنا ان کے لیے بہت مشکل ہوتا ہے۔

اس کا ثبوت امریکی ریاست میساچیوسٹ کے ایک اسکول نے پیش کیا ہے۔ ہر اسکول کی طرح اس ہائی اسکول میں بھی ایسے بچے، جنہیں اسکول آنے میں دلچسپی بہت کم ہے۔ وہ صبح سویرے اٹھنے میں دیر کرتے ہیں، جس کی وجہ سے وہ اسکول تاخیر سے پہنچتے ہیں اور اگر زیادہ دیر ہو جائے تو وہ اسکول کا رخ ہی نہیں کرتے۔

اب ایسے بچوں کو صبح بستر سے باہر نکالنے کے لیے ایک فون آتا ہے، جس میں ان کے پرنسپل کی آواز انہیں اٹھنے اور اسکول کا رخ کرنے کا پیغام دیتی ہے۔ اب ذرا سوچئے، جب صبح سویرے کسی بچے کے کان میں امی کے بجائے پہلی آواز اس کے پرنسپل کی ہو اور وہ سخت لہجے میں اس سے مخاطب ہو، تو اس بچے پر کیا بیتے گی؟ یہ پیغام پہلے سے ریکار ڈ شدہ ہے۔’’صبح کے سوا چھ بجے چکے ہیں اور آپ کا اسکول آپ سے مخاطب ہے‘‘ یہ پیغام ڈرَفی ہائی اسکول کے سب سے کاہل بچے روز سنتے ہیں۔

یہ روبوکالزکہلاتی ہیں۔ اسکول میں پہلا پیریڈ پونے آٹھ بجے شروع ہوتا ہے۔ اس کے علاوہ ان کالز کے ذریعے والدین کو موسم اور اسکول میں ہونے والی سرگرمیوں کے بارے میں بھی مطلع کیا جاتا ہے۔

تاخیر سے آنے اورغیر حاضری کو کم کرنے کے اس طریقے کے نیویارک اور الی نوئے میں بہت سے مثبت نتائج سامنے آئے ہیں۔ نیویارک میں اس کام کے لیے اسکول کے پرنسپل کے بجائے سابق باسکٹ بال کے سٹار میجک جونسن کی آواز استعمال کی گئی ہے۔

ڈرفی کے اس ہائی اسکول کے 20 فیصد لڑکے باقاعدگی سے روبوکالز موصول کرتے ہیں۔ انتظامیہ یہاں بھی پر امید ہے کہ روبوکالز اپنا کام دکھائیں گی اور حاضری 95 فیصد تک بڑھ جائے گی۔

رپورٹ: عدنان اسحاق

ادارت:امتیاز احمد