فرانسس بیکن کی پینٹنگ کی ریکارڈ نیلامی

امریکی خبر رساں ادارے اے پی نے بتایا ہے کہ اس فن پارے کی نیلامی منگل کی رات نیو یارک کی کرسٹی نامی ایک گیلری میں ہوئی۔ مصور فرانسس بیکن نے ’تھری اسٹڈیز آف لوسیان فرائڈ‘ نامی یہ سہ لوحی پینٹنگ 1969ء میں بنائی تھی، جس میں انہوں نے اپنے مصور دوست لوسیان فرائڈ کا روپ کینوس پر اتارا تھا۔

کرسٹی کی طرف سے جاری کیے گئے ایک بیان میں بتایا گیا ہے کہ گیلری میں اور ٹیلی فون لائنز پر موجود آرٹ کے دلدادہ افراد کے مابین چھ منٹ کی گرما گرم بولی کے بعد اس تاریخی پینٹنگ کی حتمی قیمت لگائی گئی۔ اس پینٹنگ کی ابتدائی بولی 80 ملین ڈالر لگائی گئی تھی۔ پینٹنگ کو کس نے خریدا، اس بارے میں معلومات فراہم نہیں کی گئی ہیں۔ امریکی اخبار نیو یارک ٹائمز کے مطابق اس پینٹنگ کی بولی ميں مجموعی طور پر سات افراد نے حصہ لیا۔

قبل ازیں نیلامی کے دوران سب سے زیادہ قیمت میں فروخت ہونے والے فن پارے کا اعزاز ایڈوڈ مونک کی پینٹنگ The Scream کے پاس تھا، جو سن 2012 میں 120ملین ڈالر میں فروخت ہوئی تھی۔ اس ریکارڈ فروخت سے قبل بیسویں صدی عیسوی کے تمثیلی فنکار فرانسس بیکن کی سب سے مہنگی قیمت میں خریدی جانے والی پینٹنگ Triptych تھی ، جو 2008ء میں چھیاسی ملین ڈالر میں فروخت ہوئی تھی۔ یہ پینٹنگ انہوں نے 1976ء میں تخلیق کی تھی۔

فرانسس بیکن اور لوسیان فرائڈ 1945ء میں ملے تھے اور جلد ہی دونوں میں ایک قریبی تعلق قائم ہو گیا تھا۔ اپنی رفاقت کے دوران ان دونوں مصوروں نے ایک دوسرے کی متعدد پینٹنگز بنائی تھیں۔

خبر رساں ڈی پی اے کے مطابق اسی نیلامی میں امریکی آرٹسٹ جیف کونز کا Balloon Dog نامی مجمسہ 58.4 ملین ڈالر میں نیلام ہوا۔ يہ کسی زندہ فنکار کا بکنے والا سب سے مہنگا ترين نمونہ ہے۔ 3.65 میٹر اونچا یہ مجسمہ تانبے کے رنگ کے بے داغ اسٹیل سے بنایا گیا ہے، جو غبارے سے بنائے گئے کتے سے مشابہ ہے۔

قبل ازیں جس زندہ فنکار کا کوئی نمونہ سب سے زیادہ قیمت میں نیلام ہوا تھا، وہ جرمن مصور گیرہارڈ رشٹر تھے۔ ان کی Domplatz, Mailand نامی ایک پینٹنگ 37.1 ملین ڈالر میں خریدی گئی تھی۔ 1968ء میں تخلیق کردہ میلان کے کیتھیڈرل اسکوائر کی یہ پینٹنگ بھی نیو یارک میں ہی نیلام ہوئی تھی۔