لشکر جھنگوی کا سربراہ ملک اسحاق، تیرہ دیگر عسکریت پسند ہلاک

پاکستانی صوبہ پنجاب کے دارالحکومت لاہور سے ملنے والی نیوز ایجنسی اے ایف پی کی رپورٹوں کے مطابق ملک اسحاق اور ممنوعہ عسکریت پسند تنظیم لشکر جھنگوی کے کئی دیگر سرکردہ ارکان آج بدھ انتیس جولائی کے روز صبح سویرے ہونے والے ایک مبینہ پولیس مقابلے میں مارے گئے۔

اے ایف پی نے اپنی رپورٹوں میں لکھا ہے کہ لشکر جھنگوی کو ایک عرصے تک دہشت گرد نیٹ ورک القاعدہ کے قریب سمجھا جاتا تھا اور حال ہی میں ایسی اطلاعات بھی ملنا شروع ہو گئی تھیں کہ پاکستان میں زیادہ تر فرقہ ورانہ بنیادوں پر بے دریغ قتل و غارت کرنے والا یہ مسلح گروپ شام اور عراق کے وسیع تر علاقوں پر قابض دہشت گرد گروہ اسلامک اسٹیٹ یا دولت اسلامیہ کے ساتھ بھی رابطے قائم کرنے لگا تھا۔

ملک اسحاق گزشتہ چند برسوں کے دوران کئی بار پولیس کی حراست میں رہا تھا اور آخری مرتبہ اسے گزشتہ ہفتے کے روز گرفتار کیا گیا تھا۔ ملک اسحاق کی ہلاکت کا سبب بننے والے مبینہ پولیس مقابلے میں شریک پنجاب پولیس کے ایک اعلٰی افسر نے اے ایف پی کو بتایا کہ اس سنی عسکریت پسند رہنما کو جنوبی پنجاب کے شہر مظفر گڑھ میں پولیس کی بھاری نفری کی حفاظت میں لے جایا جا رہا تھا کہ اس کے حامیوں نے اس پولیس قافلے پر حملہ کر دیا۔

اس پولیس اہلکار کے بقول حملے کے بعد جو مسلح مقابلہ شروع ہوا، اس میں ملک اسحاق کے علاوہ اس کے دو بیٹوں سمیت مجموعی طور پر لشکر جھنگوی کے 13 دیگر سرکردہ شدت پسند بھی مارے گئے۔ ’’اس مسلح مقابلے میں چھ پولیس اہلکار زخمی بھی ہوئے۔‘‘

آج اس خونریز واقعے کے بعد پنجاب کے وزیر داخلہ شجاع خانزادہ نے تصدیق کرتے ہوئے اے ایف پی کو بتایا، ’’علی الصبح پیش آنے والے اس واقعے میں ملک اسحاق اور فرقہ ورانہ بنیادوں پر عسکریت پسندی کرنے والے تیرہ دیگر شدت پسند بھی ہلاک ہو گئے، جن میں ملک اسحاق کے دو بیٹے بھی شامل ہیں۔‘‘

ایک اور پولیس اہلکار نے بتایا کہ لشکر جھنگوی کے عسکریت پسندوں کی طرف سے ملک اسحاق کو لے جانے والے پولیس کے قافلے پر حملہ اس وقت کیا گیا، جب سکیورٹی اہلکار اس عسکریت پسند رہنما اور اس کے کئی ساتھیوں کو لے کر ان کی تنظیم کی ملکیت دھماکا خیز مواد برآمد کرنے جا رہے تھے۔

حکام کے مطابق مرنے والوں میں چھ ایسے عسکریت پسند شامل ہیں جو پہلے ہی پولیس کی حراست میں تھے جبکہ باقی آٹھ کا تعلق ان شدت پسندوں سے تھا، جنہوں نے مبینہ طور پر ملک اسحاق کو چھڑانے کے لیے پولیس پارٹی پر حملہ کیا تھا۔ پولیس کے بقول اس مقابلے کے دوران کئی مسلح حملہ آور فرار ہونے میں کامیاب ہو گئے۔

سرکاری انتظام میں کام کرنے والے مظفر گڑھ کے ڈسٹرکٹ ہسپتال کے میڈیکل سپرنٹنڈنٹ مشتاق رسول نے بھی تصدیق کر دی کہ اس واقعے کے بعد ڈسٹرکٹ ہسپتال میں مجموعی طور پر 14 ہلاک شدگان کی لاشیں لائی گئیں۔

کالعدم عسکریت پسند تنظیم لشکر جھنگوی نے ابھی تک اس واقعے پر اپنا ردعمل ظاہر نہیں کیا لیکن پاکستان میں اس طرح کے مسلح پولیس مقابلوں میں عسکریت پسندوں اور مطلوب مجرموں کی ہلاکت کے واقعات کو اکثر شک و شبے کی نگاہ سے دیکھا جاتا ہے۔