Chibok ya sake komawa karkashin gwamnati

Dakarun Najeriya sun amshe Chibok daga hannun Boko Haram ne a karkashin jagorancin runduna ta bakwai. A wannan gari ne aka yi awon gaba da 'yan mata 'yan makaranta su sama da dari biyu fiye da watanni shidan da suka gabata.

Kakakin rundunar sojin kasar, Birgediya Janar Olajide olaleye ne ya tabbatar wa kamfanin dillancin labaran Associated Press da wannan labarin, ya na mai cewa babu shakka yanzu Chibok na hannun jami'an tsaro, inda ya kuma karawa mazauna garin na Chibok karfin gwiwar komawa gida.

Idan ba a manta ba, a daren Alhamis ne garin na Chibok ya fada hannun kungiyar Boko Haram. Dubban 'yan garin ne suka tsere lokacin da ayarin 'ya'yan kungiyar ya afka wa Chibok cikin motoci kirar akori-kura da babura, inda suka hallaka da dama suka kuma kona matsugunnensu.