BP njofton sukses të pjesshëm në luftën kundër ndotjes me naftë - Fije shprese në Gjirin e Meksikës

Pas rreth katër javësh, nga Gjiri i Meksikës ku vazhdon të derdhet pa pushim naftë, erdhi një lajm i mirë: koncerni britanik i naftës BP njofton për një sukses të parë të pjesshëm.

Pas disa përpjekjesh të dështuara njoftohet se teknikët ia dolën mbanë që me anë të robotëve nënujorë të fusin në gypat e naftëssjellësit që gjenden në thellësi 1.600 metra, një tub thithës me një diametër prej 15 cm. Me ndihmën e këtij tubi bëhet e mundur, që të paktën një pjesë e naftës të thithet dhe të depozitohet nëpër anije cisternë, tha një zëdhënës i koncernit BP. E paqartë mbetet se sa naftë mund të mblidhet në këtë mënyrë. Maksimalisht 85% thotë qendra e emergjencës.

Gjithësesi, sipas mendimit të ekspertëve, do të duhen ende ditë në mos javë deri sa të çarat në tabanin e detit të mbyllen plotësisht.

Ajo që çudit shumëkënd është që në brigjet e Luizianës, të Misisipit dhe të Alabamës, vazhdon të shihet vetëm pak naftë e përzier me ujin. Shkakun për këtë biologët e konstantuan vetëm para pak ditësh: nën sipërfaqen e ujit u vunë re sasi të mëdha nafte në formë brezash që kanë një gjatë prej rreth 16 km, një gjerësi prej 6 km dhe një lartësi prej 100 metrash. Një nga shkaqet që nën sipërfaqen e ujit janë krijuar breza të tillë nafte mund të jenë kimikatet e përdoruara për të ndërprerë rrjedhjen e naftës dhe për përdorimin e tyre në SHBA ka qëndrime të ndryshme.

Forca të Gardës Kombëtare amerikane vendosin pengesa për thithjen e naftës përgjatë brigjeve të ishullit Dauphin në Gjirin e Meksikës.

Doug Suttles i koncernit BP e mbrojti përdorimin e lëndëve kimike: "Edhe pse në det është derdhur shumë naftë ajo nuk ka pasur shumë ndikim tek brigjet, dhe kjo është pjesërisht meritë e përpjekjeve tona dhe sigurisht meritë e nënës natyrë."

Përparësia e kimikateve është se ato e shpërbëjnë naftën, por toksikologët mendojnë se kimikatet që përdoren për këtë qëllim janë mjaft helmuese. Megjithatë Autoritetet për Mbrojtjen Bregdetare e kanë miratuar përdorimin e tyre. Mary Landers, drejtuesja e misionit pranë Autoritetit për Mbrojtjen Bregdetare thotë: "Ky mjet ndihmës analizohet dhe vëzhgohet prej nesh me rigorozitet."

Deri tani ishte vënë re se përdorimi i kimikateve dhe nafta e shpërbërë nuk kanë pasur pasoja aq të rënda ndaj sistemit ekologjik, sa do të kishte nafta e patrajtuar.

Autor: Klaus Kastan / Pandeli Pani

Redaktoi Eliana Xhani

Më shumë për këtë temë

Na ndiqni!