Miratohet ligji për emigracionin në Greqi

Parlamenti në Athinë miratoi ligjin e ri të emigracionit, që rakordon legjislacionin grek me atë të vendeve të BE-së. Në këtë mënyrë dhe emigrantët e Greqisë këtej e tutje do të kenë të drejtën të aplikojnë për leje qëndrimi pesë vjeçare duke filluar nga 2006, dhe jo nga viti 2009 siç parashikohej në projektligj. Ky ligj u miratua pas debatesh të ashpra mes pozitës dhe opozitës. Opozita socialiste votoi kundër, sepse ajo kërkonte ndryshime radikale në përmbajtjen e dispozitave ligjore, ndër to edhe njohjen e së drejtës së nënshtetësisë për fëmijët e emigrantëve
Ministri i brendshëm grek, Prokopi Sparopullos, arkitekt i ligjit, u detyrua të ulë tonet e entuziazmit të tij, përballë kritikave ndaj projektligjit dhe trajtim johuman të emigrantëve. Ai pranoi si të drejtë vërejtjen e komisionit shkencor për mospajtim me legjislacionin komunitar. Ndërkohë që kryetari i opozitës greke, Papandreu shkaktoi habi në opinionin grek me propozimet e tij, që t'u jepet e drejta e nënshtetësisë greke të gjithë fëmijëve të emigrantëve që lindin në Greqi, kurse me shtatë vjet qëndrimi aty të kenë të drejtën e votës në zgjedhjet lokale.