Nato i përgjigjet kërkesës së Berlinit

Në bazë të një ankese të Gjermanisë, Nato do të përqëndrojë trupat më shumë në veriun jostabil të Kosovës. Ministrat e Mbrojtjes së Natos reaguan kështu ndaj një sugjerimi të ministrit gjerman Thomas de Maiziere, që ka propozuar pakësimin i kontingjentit të Kforit në jug të këtij vendi të Ballkanit. Sekretari i përgjithshëm i Natos Anders Fogh Rasmussen tha se rigrupimi do të kryhet në "muajt e ardhshëm". Por nuk ka plane që të reduktohet forca e përgjithshme e Kforit, siç ishte menduar fillimisht nga Nato. Përderisa gjendja e sigurisë të mbetet e tensionuar, kjo është shtyrë për një kohë të mëvonë, tha Rasmussen.

De Maiziere niset nga fakti, se Nato që nga trazirat e fundit në veriun e vendit të dominuar nga serbët, dërgon gjithmonë një batalion rezervë, në të cilin bëjnë pjesë edhe ushtarë të Bundesverit. Kfori ka në fakt një limit maksimal prej 5 700 ushtarësh, por me këtë batalion ai arrin në 6 200 deri 6 400 ushtarë. Batalioni e përbëjnë në mënyrë të alternuar herë trupa italiane dhe herë bashkërisht trupa gjermane dhe austriake. Që nga fundi i shtatorit në shërbim është përsëri një batalion gjermano-austriak.

De Maiziere është i mendimit se Nato këtu duhet të "jetë e sinqertë", me këtë ai nënkupton, që ose të shtohet Kfori në përgjithësi, ose të hiqet dorë nga vendosja e batalionit rezervë, që ka për qëllim vetëm intervenime afatshkurtra në raste krizash. Ai propozoi tani si zgjidhje, që të lëvizen ushtarët nga jugu në veri. Nga kjo mund të hiqej dorë nga dërgimi i një batalioni.

Ministri kishte kërkuar diskutimin për operacionin e Kforit, sepse pala gjermane ka përshtypjen, që ky operacion rrezikon të kthehet në një konflikt të harruar të Natos. Ministria e Mbrojtjes nuk është e kënaqur, që Kfori kohët e fundit është dashur të veprojë shpesh kundër trazirave dhe demonstratave, megjithëse kjo është në fakt detyrë e policisë kosovare dhe misionit për shtetin ligjor, EULEX. Edhe ndaj faktit që BE pas trazirave e ka shkurtuar personelin, De Maiziere nuk tregon mirëkuptim. Gjermania është momentalisht e angazhuar me numrin më të madh të ushtarëve, 1367.