Ndërrim politike në drejtim të lindjes
28 Korrik 2004Si gjithnjë në rast lajmesh nga Ukraina edhe këtë herë lajmi mbërriti me vonesë në Perëndim. Pas vitesh përpjekjesh për afrim me Perëndimin Ukraina i kanë vizë synimit për pranim në NATO dhe në Bashkimin Evropian.
Çasti për dekretin presidencial ishte zgjedhur me zgjuarsi. Pasi presidenti ukrainas Leonid Kuçma u takua në këtë ditë për samitin e zakonshëm Ukrainë-Rusi me homologun e tij Vladimir Putin. Mos vallë një shenjë lëpirjeje? Me siguri që kështu ishte sepse presidenti ukrainas ka nevojë për mbështetjen e Moskës për të përmbushur interesat e veta në zgjedhjet e ardhshme presidenciale. Duhet të fitojë një kandidat që mbron interesat e Kuçmës dhe të grupeve të interesit të lidhura me të. Me sa duket ky kandidat do të jetë kryetari i qeverisë Viktor Janukoviç.
Shprehja e Kuçmës është një lëvizje e qartë në fushatën zgjedhore që po fillon. Me politikë pro-ruse mund të fitohen vota. Gjithashtu mund të sigurohet mbështetja ruse për "kandidatin e pushtetit", Janukoviç. Me shprehjet e tija Kuchma synonte para së gjithash votat e zgjedhësve në lindje të Ukrainës, ku Janukoviç ka bazën e vet, mendon eksperti gjerman për Evropën Lindore Reiner Lindner nga Universiteti i Konstancës:
"Për çastin Kuçma kërkon të gjejë një pasardhës, i cili mund të marrë pozicionin e tij dhe është në gjendje të përfaqësojë interesat e tija. Dhe ky duhet të jetë një kandidat që zgjidhet kryesisht me votat e Ukrainës lindore; përballë kandidatit të opozitës Viktor Jushçenko, i cili do të mobilizojë fuqishëm votat e Ukrainës perëndimore dhe qendrore. Kjo do të thotë që shpallja si doktrinë ushtarake duhet vlerësuar për çastin para së gjithash nga këndvështrimi i taktikës zgjedhore."
Që pas këtij vendimi të Kuçmës qëndrojnë interesa të qarta zgjedhore të klanit nga rajoni industrial lindor Doneck, kjo duket.
Nga ana tjetër deklarata e Kuçmës shënon një ndryshim kursi, për sa i takon politikës së jashtme të Ukrainës. Sepse për dhjetë vjet me radhë ish-republika sovjetike ishte përpjekur për pranim në NATO si dhe në Bashkimin Evropian. Anëtarësia e plotë në Bashkimin Evropian është synim strategjik dhe konstant në politikën e jashtme, deklaroi vetëm disa muaj më parë Kuçma. Por sigurisht pa korrur sukses të madh. Kievit nuk ju dha premtimi për ndonjë afat dhe Bashkimi Evropian dhe NATO-ja patën theksuar vazhdimisht që ishte ende herët për të folur për anëtarësim të plotë të Ukrainës. Në vend të kësaj Bashkimi Evropian hartoi konceptin e "fqinjësisë së re", gjë që e zemëroi së tepërmi Kievin. Në të Ukraina u vendos në të njëjtin nivel me shtetet e Magrebit ose me Republikën e Moldavisë. Zhgënjimi në Ukrainë ishte i jashtëzakonshëm dhe deklarata aktuale është shprehje e këtij zhgënjimi.