Samiti i G8-s: Në fokus problemet më emergjente të globit
8 Korrik 2008
Deri në vitin 2010 duhet të sigurohen çdo vit mbi 60 miliardë dollarë për të përgjysmuar varfërinë në botë, një ndër objektivat që ka përcaktuar OKB-ja për këtë milenium. Në Tojako vazhdon punimet takimi i nivelit të lartë të grupit të vendeve të industrializuara G-8, që ka në fokus problemet më emergjente të globit si: kriza e ushqimeve, mbrojtja e klimës dhe çmimi i lartë i naftës.
Tre krizat më të mëdha në botë
Sekretari i Përgjithshëm i OKB-së, Ban Ki Moon në një konferencë shtypi në Tojako deklaroi: "Sot që kemi dalë para jush bota po përballet me tri kriza njëkohësisht: kriza e ushqimit, kriza e klimës dhe ajo e zhvillimit. Këto kriza janë të lidhura ngushtë me njëra-tjetrën dhe është e nevojshme që atyre t´u kushtohet vëmendje e veçantë.
Duke u ndalur në pasojat e ndryshimit të klimës në Afrikë Ban Ki Moon nënvizoi: "Ne duhet të gjejmë zgjidhje për parandalimin e ndryshimit të klimës si një masë për të garantuar të ardhmen. Pasojat e ndryshimit të klimës më qartë se kudo i shohim tani në Afrikë, ku thatësira dhe luhatjet e mëdha të motit janë duke u bërë pengesë për realizimin e objektivave të mileniumit, për luftimin e varfërisë. Ndaj këtyre zhvillimeve ne duhet të veprojmë tani."
Ban Ki Moon kërkon angazhim për klimën
Në këtë drejtim është e rëndësishme që të përgjysmohet kuota e emetimit të dioksidit të karbonit në atmosferë deri në vitin 2050, tha Ban Ki Moon, por njëkohësisht sipas tij duhet që të punohet edhe në programe me afate të mesme: "Përparimet në këtë drejtim të mbështetura prej udhëheqësve të vendeve të G-8-ës do të shërbejnë si një sinjal shpresëdhënës për hartimin e një projektkonvente të OKB-së për klimën."
BE - pararojë e ruajtjes së klimës në G8
Bashkimi Evropian deklaroi, se do të verë në dispozicion rreth një miliardë euro nga subvencionet e pashfrytëzuara agrare në mbështetje të bujqve afrikanë. Kancelarja Angela Merkel premtoi për Gjermaninë një ndihmë shtesë prej 600 milionë eurosh për të luftuar krizën e ushqimeve.
Samiti i zhvillon punimet nën hijen e protestave të antiglobalistëve. Japonia i toleron protestat e antiglosbalistëve, por nga ana tjetër i mban ato nën kontroll duke mobilizuar mbi 20.000 policë për sigurinë.