امریکی سینیٹر کیری کی اخوان المسلمون کے نمائندوں سے ملاقات

مصر میں جاری انتخابی عمل کے پہلے مرحلے میں اخوان المسلمون کی کامیابی کے بعد مغربی اقوام میں جو احساس پیدا ہونے لگا ہے، امکاناً اس احساس کی روشنی میں امریکی سینیٹر جان کیری مصر پہنچ کر اہم نوعیت کی ملاقاتوں میں مصروف رہے۔ ان ملاقاتوں کے بعد جان کیری نے ذرائع ابلاغ کے نمائندوں سے گفتگو کرتے ہوئے کہا کہ مصر کو اس وقت گھمبیر اقتصادی چیلنج کا سامنا ہے۔ اس باعث مصری قیادت کو جلد از جلد انٹرنیشنل مانیٹری فنڈ کے ساتھ مالی مفاہمت کو طے کر لینا چاہیے تا کہ غیر ملکی سرمایہ کاروں کے اعتماد میں اضافہ ہو۔کیری کے مطابق مصر میں اگر اقتصادیات کی طرف توجہ مرکوز نہ کی گئی تو سماجی اور انتظامی ڈھانچے کو ناقابل تلافی نقصان ہو گا۔

مصر بین الاقوامی مالیاتی ادارے کے ساتھ تین ارب ڈالر سے زائد کے ایک مالیاتی پیکج پر بات چیت کر رہا ہے۔ حسنی مبارک کے زوال کے بعد سے مصر کے غیر ملکی زر مبادلہ کے ذخائر میں بھی مسلسل کمی واقع ہو رہی ہے۔ گزشتہ سال کے اختتام پر اس زرمبادلہ کا حجم 36 ارب ڈالر سے زائد تھا، جو اب نومبر کے اختتام پر سکڑ کر 20 ارب ڈالر پر پہنچ گیا ہے۔ مصر کو حسنی مبارک کے زوال کے بعد سے جس سیاسی انتشار کا سامنا ہے، اس کی وجہ سے غیر ملکی سرمایہ کار مصری معاشی حالات سے شاکی دکھائی دیتے ہیں۔

امریکی سینیٹ کی خارجہ امور کی کمیٹی کے چیئرمین سینیٹر جان کیری نے مصر میں قیام کے دوران عسکری کونسل کے سربراہ فیلڈ مارشل محمد حسین طنطاوی کے ساتھ ملاقات کے علاوہ الیکشن کے پہلے مرحلے میں سبقت رکھنے والی سیاسی جماعت فریڈیم اینڈ جسٹس پارٹی کے رہنماؤں سے بھی بات چیت کی۔

اخوان المسلمون کی جانب سے جاری کی گئی ایک پریس ریلیز میں بتایا گیا کہ امریکی سینیٹر جان کیری اور قاہرہ میں امریکی سفیر این ڈبلیو پیٹرسن کے ساتھ ان کی سیاسی جماعت کے تین اہم رہنماؤں نے ملاقات کی۔ اس ملاقات میں اخوان کی جانب سے واضح کیا گیا کہ اگر ان کی حکومت قائم ہوتی ہے تو وہ انسانی حقوق کے احترام کے ساتھ ساتھ بین الاقوامی معاہدوں کی بھی پاسداری کرے گی۔ ماضی میں اخوان کی جانب سے کہا گیا تھا کہ وہ اسرائیل کے ساتھ طے پانے والے معاہدے پر نظرثانی کا ارادہ رکھتی ہے۔ پریس ریلیز میں بتایا گیا کہ سینیٹر جان کیری نے اخوان المسلمون کے اراکین کے ساتھ بات چیت کرتے ہوئے واضح کیا کہ ان کی کامیابی حیران کن نہیں ہے۔

رپورٹ: عابد حسین

ادارت: عدنان اسحاق