بھارتی حکومت کام کرنے میں رکاوٹ ہے، غیر ملکی امدادی ادارے

بھارت میں کام کرنے والے امدادی اور انسانی حقوق کے اہم ادارے نریندر مودی حکومت پر الزام عائد کر رہے ہیں کہ انہیں مختلف القسم کے اوچھے حکومتی ہتھکنڈوں کا سامنا ہے۔ ان میں دفاتر پر دھاوا بولنا، بینک اکاؤنٹس کو منجمد کرنا اور ملازمین کی سفری پابندیاں شامل ہیں۔ ان اداروں کے مطابق بھارتیہ جنتا پارٹی کی حکومت میں انہیں مشکل صورت حال کا سامنا ہے۔

ان اداروں نے واضح کیا ہے کہ ایسے اقدامات کی ایک وجہ تو وزیراعظم نریندر مودی کی قوم پرست ہندو سیاسی جماعت بھارتیہ جنتا پارٹی کا اپنا قائم کردہ سماجی و معاشرتی تنظیموں کا نیٹ ورک ہے۔ ایسی ملکی غیر حکومتی تنظیموں کو کسی حد تک موجودہ حکومت کی سرپرستی تو حاصل ہے لیکن سرکار کی ہمدردی بھی واضح طور پر انہیں ہی حاصل ہے۔

ایسی تنظیموں میں ایک گرین پیس انڈیا بھی ہے۔ یہ ادارہ  حکومت پرمسلسلز دباؤ ڈال رہا ہے کہ وہ  فضائی آلودگی کو بہتر بنائے۔ اس ادارے نے بتایا ہے کہ نئی دہلی حکومت کی ہدایت پر اُس کے دو مختلف علاقائی دفاتر کو بند کر دیا گیا ہے۔ اس کے ساتھ ساتھ بنگالُورو میں اسٹاف کو بھی کم کرنے کی ہدایت کی گئی ہے۔ حکومتی حکم پر گرین پیس انڈیا کے مقامی دفاتر کے بینک اکاؤنٹس کو منجمد کر دیا گیا ہے۔

بھارت کے انکم ٹیکس محکمے نے ماحول دوست تنظیم گرین پیس انڈیا پر الزام لگایا ہے کہ یہ غیر قانونی طور پر شیل کمپنی کے ایک علیحدہ سے قائم ذیلی ادارے سے خصوصی فنڈ حاصل کرنے کا سلسلہ جاری رکھے ہوئے ہے۔ شیل کمپنی اس طریقے سے اپنے ٹیکس کو چھپانے کی کوشش میں ہے۔ اس بنیاد پر بھارتی وزیر داخلہ نے شیل کمپنی کے اس ذیلی دفتر کا لائسینس منسوخ کر دیا ہے۔

انسانی حقوق کے انٹرنینشل ادارے ایمنسٹی کے بھارتی دفتر نے مودی حکومت پر الزام لگا رکھا ہے کہ وہ آزادی اظہار کو کنٹرول کرنے کی کوشش کر ر ہی ہے اور اس تناظر میں کئی ناقدین کو جیل بھیجا جا چکا ہے۔ اس ادارے کو حکومتی حکم پر اپنے اسٹاف میں تیس فیصد کی کمی کرنا پڑی اور اڑسٹھ ملازمین کو فارغ کر دیا گیا۔ ایمنسٹی کے بھارتی دفتر پر ملکی وزارت خزانہ کے تفتیشی اہلکاروں نے گزشتہ برس نومبر میں بارہ گھنٹے تک چھاپہ مار کر دستاویزات کی تلاشی اور ملازمین سے باز پرس کی تھی۔

گرین پیس انڈیا جیسا الزام ایمنسٹی انٹرنیشنل کے بھارتی دفتر پر بھی لگایا گیا کہ اس نے بھی شیل کمپنی کے ایک ذیلی ادارے سے 3.5 ملین امریکی ڈالر وصول کیے تھے۔ ایمنسٹی انٹرنیشنل اور گرین پیس نے حکومتی الزامات کی سختی سے تردید کی ہے۔

سن 2014 میں برسراقتدار آنے کے بعد مودی حکومت تقریباً پندرہ ہزار خیراتی و امدادی اداروں کے اجازت نامے منسوخ کر چکی ہے۔ ان کو غیر ملکی امداد حاصل کرنے کے الزام کا سامنا تھا۔ مودی حکومت کے نائب وزیر داخلہ کیرن رجیجو کا کہنا ہے کہ یہ تمام ادارے وقت پر انکم ٹیکس کی ادائیگی اور دوسری اہم دستاویزات حکومت کو فراہم  کرنے سے قاصر رہے تھے۔