تارکین وطن کو سمندر سے بچایا تو بہت بڑے جرمانے: اطالوی حکومت

روم میں اطالوی حکومت کی طرف سے منگل گیارہ جون کو منظور کردہ ایک سرکاری حکم نامے کے مطابق تارکین وطن کی آمد کے مخالف عوامیت پسند سیاست دان ماتیو سالوینی کی قیادت میں ملکی وزارت داخلہ اب قانوناً ایسی غیر سرکاری امدادی تنظیموں سے 10 ہزار یورو سے لے کر 50 ہزار یورو (ساڑھے گیارہ ہزار سے لے کر ستاون ہزار امریکی ڈالر تک کے برابر) جرمانے کی رقوم کے مطالبے بھی کر سکے گی، جو کھلے سمندروں سے یورپ آنے کے خواہش مند غیر ملکی تارکین وطن کو بچا کر اطالوی بندرگاہوں تک لائیں گی۔

بحری جہاز اور کشتیاں بھی ضبط

اس کے علاوہ ایسی رضاکار ریسکیو تنظیمیں، جو اطالوی بندرگاہوں پر اپنے جہازوں کے ساتھ بلا اجازت لنگر انداز ہوں گی، انہیں یہ خطرہ بھی ہو گا کہ روم حکومت ان کے بحری جہازوں اور امدادی کشتیوں کو مستقل بنیادوں پر ضبط کر لے گی۔ اس حکم نامے کے مطابق یہ جرمانے کسی بھی متعلقہ بحری جہاز یا کشتی کے کپتان، اس کو چلانے والی غیر سرکاری تنظیم یا اس جہاز کی مالک کمپنی کو ادا کرنا ہوں گے۔

روم میں اس وقت بائیں بازو کی عوامیت پسند فائیو سٹار موومنٹ اور دائیں بازو کی عوامیت پسند جماعت لیگ پارٹی پر مشتمل ایک مخلوط حکومت قائم ہے۔ لیگ پارٹی کے سربراہ ماتیو سالوینی ہیں، جو وزیر داخلہ بھی ہیں۔ روم سے ملنے والی رپورٹوں کے مطابق یہ نیا مہاجرین مخالف سرکاری حکم نامہ زیادہ تر ماتیو سالوینی ہی کی سوچ کا نتیجہ ہے اور وہی اطالوی حکومت کی ان کوششوں کی قیادت بھی کر رہے ہیں کہ ملک میں تارکین وطن کی غیر قانونی آمد پر ہر حال میں قابو پایا جانا چاہیے۔

تاخیر سے جاری کیا گیا حکم نامہ

روم حکومت کی طرف سے اس حکم نامے کے اجراء کا پروگرام تو کافی پہلے بنایا گیا تھا لیکن اس میں اقوم متحدہ کے علاوہ خود اطالوی صدر کے دفتر کی طرف سے کی جانے والی شدید تنقید کی وجہ سے بھی کافی تاخیر ہو گئی تھی۔ لیکن پھر منگل گیارہ جون کے روز جب ملکی کابینہ نے اس سرکاری حکم نامے کی منظوری دے دی، تو وزیر داخلہ سالوینی نے اسے ملکی سلامتی کی طرف ایک اہم قدم قرار دہتے ہوئے اس کو بھرپور انداز میں سراہا۔

ماتیو سالوینی نے کہا، ''مجھے ہر ممکن حد تک یقین ہے کہ یہ حکم نامہ تمام تر قومی اور بین الاقوامی قوانین سے قطعی مطابقت رکھتا ہے اور کسی بھی مروجہ قانون کے منافی نہیں ہے۔

پولیس کے اضافی اختیارات

اسی حکم نامے کے ذریعے اطالوی پولیس کو یہ اختیار بھی دے دیا گیا ہے کہ وہ تارکین وطن کی اٹلی آمد سے متعلق انسانوں کی ممکنہ اسمگلنگ کے الزام میں اپنی تفتیش کے لیے خفیہ طریقے بھی اختیار کر سکے گی۔ اسی شق کے تحت پولیس کو انسانوں کی اسمگلنگ کرنے والے مشتبہ عناصر کی الیکٹرانک جاسوسی کا اختیار بھی دے دیا گیا ہے۔

ماتیو سالوینی کو اطالوی وزیر داخلہ کے منصب پر فائز ہوئے تقریباً ایک سال ہو چکا ہے۔ اس دوران وہ کئی ایسے نئے سرکاری ضابطے اور حکم نامے بھی متعارف کرا چکے ہیں، جن کا مقصد تارکین وطن کی آمد کو روکنا ہے۔

ان میں سے اہم ترین اور بہت ہی متنازعہ فیصلہ وہ تھا، جس کے تحت روم حکومت نے گزشتہ برس دسمبر میں ایسے تارکین وطن کے لیے، جو مہاجرین کی باقاعدہ قانونی حیثیت کے حقدار نہ ہوں، انسانی بنیادوں پر تحفظ کی قانونی سہولت بھی ختم کر دی تھی۔

کھلے سمندروں میں لاکھوں انسانی جانوں کو خطرہ

گزشتہ کئی برسوں کے دوران شمالی افریقی ممالک سے سمندر پار کر کے لاکھوں کی تعداد میں تارکین وطن جنوبی یورپ کے یونان، اٹلی اور اسپین جیسے ممالک میں پہنچ چکے ہیں۔ صرف بحیرہ روم کے وسطی حصے سے انتہائی غیر محفوظ کشتیوں کے ذریعے خطرناک سفر کر کے اٹلی پہنچنے والے پناہ کے متلاشی افراد کی 2014ء سے لے کر اب تک کی تعداد ہی چھ لاکھ سے زائد بنتی ہے۔ اس دوران 14 ہزار سے زائد تارکین وطن اور پناہ کے متلاشی افرد سمندر میں ڈوب کر ہلاک بھی ہو چکے ہیں۔

سال رواں کے دوران ہلاکتیں

اقوام متحدہ کے مہاجرین کے امدادی ادارے یو این ایچ سی آر اور بین الاقوامی ادارہ برائے مہاجرت آئی او ایم کے اعداد و شمار کے مطابق شمالی افریقہ سے اس سال کے دوران اب تک یورپ پہنچنے والے تارکین وطن کی تعداد بھی دو ہزار کے قریب ہو چکی ہے۔ اس کے علاوہ اسی سفر کے دوران گزشتہ قریب ساڑھے پانچ ماہ کے عرصے میں یورپ پہنچنے کے خواہش مند تقریباً 350 تارکین وطن سمندر میں ڈوب کر ہلاک بھی ہو گئے۔

م م / ع ح / اے ایف پی