جرمنی میں اتحاد ایئرویز کے خلاف دو ارب یورو ہرجانے کا مقدمہ

جرمنی کے مالیاتی مرکز فرینکفرٹ سے جمعہ چودہ دسمبر کو موصولہ نیوز ایجنسی اے ایف پی کی رپورٹوں کے مطابق وفاقی جرمن دارالحکومت برلن کی ایک علاقائی عدالت نے تصدیق کر دی ہے کہ اتحاد ایئرویز کے خلاف دو ارب یورو تک کے زر تلافی کی ادائیگی کا ایک مقدمہ اس عدالت میں زیر سماعت ہے۔

یہ مقدمہ ایئر برلن کے دیوالیہ پن کے نگران عہدیدار کی طرف سے اس لیے دائر کیا گیا ہے کہ اتحاد ایئرویز جرمنی کی اس کالعدم فضائی کمپنی کے حصص کی مالک ایک بڑی کمپنی تھی۔

عدالت کی طرف سے جاری کردہ ایک بیان کے مطابق ایئر برلن کے دیوالیہ پن سے متعلقہ امور کے مالیاتی نگران عہدیدار لوکاس فلوئتھر نے برلن کی اس عدالت سے درخواست کی ہے کہ پہلے تو کالعدم ایئر برلن کو اتحاد ایئرویز سے 500 ملین یورو دلوائے جائیں اور پھر ساتھ ہی یہ حکم بھی سنایا جائے کہ اتحاد ایئرویز کو مجموعی طور پر قریب دو ارب یورو (تقریباﹰ سوا دو ارب امریکی ڈالر) کے برابر زر تلافی ادا کرنا چاہیے۔

عدالتی بیان کے مطابق اتحاد ایئرویز کے خلاف یہ مقدمہ اس الزام کے تحت دائر کیا گیا ہے کہ متحدہ عرب امارات کی اس ایئرلائن نے مبینہ طور پر ایئر برلن کے ساتھ مالی تعاون کے اپنے اس معاہدے پر ڈیڑھ برس تک عمل نہیں کیا تھا، جو گزشتہ برس اپریل میں طے پایا تھا۔

اس دوران اماراتی فضائی کمپنی اتحاد ایئرویز نے گزشتہ برس اگست میں ایئر برلن کی مالی مدد سے بھی ہاتھ کھینچ لیا تھا، جس کے بعد جرمنی کی یہ دوسری سب سے بڑی فضائی کمپنی دیوالیہ ہو گئی تھی۔ اتحاد ایئرویز 2011ء سے ایئر برلن کے دیوالیہ ہو جانے تک اس کمپنی کے 29.2 فیصد حصص کی مالک تھی۔

ایئر برلن کے دیوالیہ ہو جانے سے قبل اتحاد ایئرویز نے کئی برسوں تک اس جرمن فضائی کمپنی کو متعدد مرتبہ ہنگامی بنیادوں پر وسیع تر رقوم بھی مہیا کی تھیں۔ یہ رقوم اگست 2017ء سے قبل اس عرصے میں مہیا کی گئی تھیں، جب ایئر برلن کو اپنی سب سے بڑی حریف ایئرلائن اور جرمنی کی سب سے بڑی فضائی کمپنی لفتھانسا کے ساتھ سخت مقابلے کے باعث بقا کا مسئلہ درپیش تھا۔

م م / ع ب / اے ایف پی