سویڈن میں جنسی تعلقات سے متعلق نیا ملکی قانون نافذ

اسکینڈے نیویا کی ریاست سویڈن کے دارالحکومت سٹاک ہوم سے پیر دو جولائی کو ملنے والی نیوز ایجنسی ڈی پی اے کی رپورٹوں کے مطابق اس نئے قانون کو سویڈن میں عرف عام میں جنسی حوالے سے ’لاء آف انڈرسٹینڈنگ‘ کا نام دیا جا رہا ہے۔ یہ قانون اس بات کا متقاضی ہے کہ کسی بھی جنسی رابطے سے قبل فریقین کے مابین اس عمل پر ’واضح اور قابل شناخت آمادگی‘ کا ہونا لازمی ہے۔ اگر ایسی کسی واضح آمادگی کا اظہار نہ کیا گیا ہو، تو یہی عمل جنسی زیادتی یا ریپ کے زمرے میں آئے گا۔

جنسی نوعیت کے جرائم کی روک تھام کے لیے سویڈن میں یکم جولائی سے نافذالعمل ہو جانے والے اس قانون کا مقصد یہ ہے کہ ایسے تمام جنسی رابطوں کو روکا جا سکے، جن کے بارے میں بعد میں ایسے کسی بھی رابطے کے کسی بھی فریق کی طرف سے یہ کہا جاتا ہو کہ اس کے ساتھ جنسی زیادتی کی گئی ہے۔

تیس جون اور یکم جولائی کی درمیانی نصف شب سے نافذ ہو جانے والے اس ملکی قانون کے مطابق جنسی زیادتی کے کسی بھی مجرم کو سزا دلوانے کے لیے آئندہ اب صرف یہی کافی نہیں ہو گا کہ مثال کے طور پر ایسے کسی بھی عمل سے قبل متاثرہ فرد نے ایسے کسی رابطے کے خلاف اپنا ’دفاع کرنے کی کوشش‘ کی تھی یا دوسرے فریق کو ایسی کسی بھی پیش رفت سے ’ناں‘ کہہ کر روکنے کی کوشش کی تھی۔

اس کے برعکس اب اسکینڈے نیویا کے اس ملک میں کسی بھی دو افراد کے مابین ایسے کسی بھی جنسی رابطے سے قبل یہ بہرصورت لازمی ہو گا کہ دونوں فریقین نے ایسی کسی جسمانی قربت سے قبل ’واضح اور قابل شناخت‘ انداز میں اپنی رضا مندی ظاہر کی ہو۔

اس نئے قانون کے ناقدین اسے اس لیے متنازعہ قرار دے رہے ہیں کہ ان کے مطابق اصل بات یہ ہو گی کہ آئندہ اسی قانون کو سویڈش عدالتوں میں کیسے استعمال کیا جاتا ہے اور اس کی وضاحت کرتے ہوئے یہ کیسے طے کیا جائے گا کہ کسی بھی فریق کی طرف زبانی رضامندی ظاہر کی گئی تھی یا غیر زبانی اور آیا وہ کافی تھی۔

سٹاک ہوم میں موجودہ ملکی حکومت خود کو ’خواتین کے حقوق کے حوالے سے انتہائی سرگرم‘ قرار دیتی ہے اور یہ قانون ملکی اور بین الاقوامی سطح پر اس شدید بحث کے نتیجے میں منظور اور نافذ کیا گیا ہے، جس نے سوشل میڈیا نیٹ ورکس پر #MeToo کے ہیش ٹیگ کے ساتھ ایک عالمگیر تحریک کی حیثیت حاصل کر لی تھی۔

اس بارے میں سویڈش وزیر اعظم شٹیفان لوئفوَین نے سٹاک ہوم میں اس قانون کی مقصدیت کی وضاحت کرتے ہوئے کہا، ’’کوئی بھی جنسی رابطہ ہمیشہ واضح انفرادی رضا مندی کا نتیجہ ہونا چاہیے۔ اب جنسی رابطے کے لیے کسی بھی پیش رفت کے خلاف ’کچھ نہ کرنے‘ کو متاثرہ فرد کی ’خاموش رضامندی‘ نہیں سمجھا جائے گا، بلکہ اس کے لیے ’ذاتی آمادگی کا واضح اظہار‘ قطعی لازمی ہو گا۔‘‘

م م / ع ا / ڈی پی اے