«په افغانستان کې ښځې په ځانګړي بیړني وضعیت کې دي»
۱۴۰۲ اسفند ۱۸, جمعه
د پروتستانت کلیسا د مرستو سازمان د جمعې په ورځ د ښځو نړیوالې ورځې په مناسبت ویلي دي چې په ۲۰۲۱م کال کې، له کله راهیسې چې طالبان یو وار بیا په افغانستان کې واک ته رسیدلي دي د ښځو او نجونو حقونه یې په پراخه پيمانه محدود کړي دي.
د دغو محدودیتونو په لړ کې د ملګرو ملتونو په پروګرامونو او مرستندویه سازمانونو کې د ښځو پر کار بندیز، د دې سبب شوی دی چې ښځې د مرستو له ترلاسه کولو او ژوند ژغورونکي ملاتړ څخه محرومې پاتې شي.
د حفاظت او رواني ټولنیز ملاتړ د چارو کارپوهه هيرام کاباریتا وویل: «دا دوی د پخوا په پرتله ډېرې زيانمنونکي کوي.»
له ناورینونو سره د مرستې سازمان ډیاکوني دې خبرې ته په اشارې کولو سره ویلي دي پاکستان په سلګونو زره افغان مهاجر چې اسناد نه لري بیرته د دوی هیواد افغانستان ته ستنوي. په دوی کې ډیرې یې ښځې او نجونې دي.
دغې مرستندویه سازمان ټینګار کړی دی: «په خپل وطن کې دوی له عامه ژوند څخه د ایستل کیدلو او بشري مرستو ته د نه لاسرسي له ګواښ سره مخامخ کیږي».
پر دې سربیره د نفقې پيدا کولو ستونزمن وضعیت هم ورعلاوه کیږي. یوې اوږدمهالې وچکالۍ دغه هیواد د ولږې او قحطۍ د ناورین کندې ته برابر کړی دی.
ډیر شمیر زلزلو د دې هیواد ځینې برخې ویجاړې کړي دي او یوه اضافي اقتصادي بحران بیا په میلیونونو انسانان له بې وزلې سره مخامخ کړي دي.
د ډیاکوني د ناورینونو د مرستې سازمان زیاته کړې ده «شا او خوا نیم میلیون مهاجر له داسې یو وضعیت سره مخامخ دي چې د لسګونو کلونو راهیسې په پاکستان کې له اوسیدو وروسته باید بیرته خپل هیواد ته ستانه شي.»
د پاکستان حکومت په اکتوبر میاشت کې ټولو هغو بهرنیانو ته چې په دغه هیواد کې د پاتې کیدو له پاره د اعتبار وړ اسناد نه لري، له دغه هیواد څخه د وتلو ضرب الاجل ټاکلی وو.
دغه پریکړه له شاوخوا ۴ میلیونه افغان مهاجرو څخه چې په پاکستان کې اوسیږي ۱،۷ میلیونه یې اغیزمنوي.
آژانسونه: ش.ن/ ب.ص