Majina 5 ya utani ya Malkia Elizabeth
Mbali ya kuwa kwake mtawala wa Uingerez, Malkia Elizabeth II pia ni bibi, mama na mke, jambo linalomaanisha kuwa sio tu ana majina na vyeo rasmi, bali pia ana majina kadhaa ya utani na mengine ya kuchekesha.
Lilibet
Matamshi ya jina "Elizabeth" ni gumu si kwa Waswahili pekee, bali hata binti huyu aliyekuja kuwa malkia alikuwa akipata shida kulitamka jina lake alipokuwa mtoto. Ndiyo maana alikuwa akijiita "Lilibet". Familia yake iliendelea kumuita hivyo hadi alipochukuwa madaraka mwaka 1952.
Shirley Temple
Baba mdogo wa Elizabeth, Edward, aligundua mfanano wa kustaajabisha kati ya Elizabeth msichana na Shirley Temple. Ndio maana alichaguwa jina la nyota huyo wa Kimarekani kuwa jina alipendalo kumuita mpwa wake. Kwa kuachia taji la ufalme mwaka 1936 na kumuoa mrembo na mtalikiwa wa Kimarekani, Wallis Simpson, Edward alimuwezesha Elizabeth kuwa malkia.
Gary
Miaka mingi kabla ya picha hii kupigwa, Mwana Mfalme William akiwa mtoto mdogo hakuweza kutamka neno "Granny" (Bibi) na badala yake akitamka "Gary", jina la kiume, na la kawaida, sio? Hapana shaka, Malkia Elizabeth alimruhusu mjukuuwe mpenzi amuite hivyo.
Gan-Gan
Mtoto wa kiume wa Prince William naye pia alikuwa akipata tabu kutamka neno "Granny". Alipokuwa na miaka miwili, alikuwa akimuita Malkia Elizabeth "Gan-Gan". Ndivyo alivyosema Binti Mfalme Kate kwenye filamu fupi kuhusu familia hiyo ya kifalme. La kufurahisha ni kuwa mwanamfalme huyo sasa ameshapita umri huo. Atatimia miaka mitano mwezi Julai.
Cabbage
Mwana Mfalme Philip na Malkia Elizabeth walioana miaka 70 iliyopita. Litakuwa jambo la karaha kama atakuwa anamuita "Malkia" au "Mtukufu". Jina la utani analotumia kumuita mkewe limewekwa hadharani hivi karibuni. Kwa mahaba anamuita "Kabichi". Kuna mashaka juu ya sababu za kuchaguwa jina hili.